في البداية احب اوجه شكر للفنان حمادة سلوكة سوري قصدي (حمادة هلال) علي حسن اداؤه في الاغنية الروعة
فهو الشخص الوحيد اللي نبهنا ان شهداء 25 يناير ماتوا في احداث يناير والأدهي من كدة شهداء 25 يناير ماتوا
وفارقوا الحياة.
ام هند...دي اول تدوينة ليا وعاوز اتكلم فيها عن الثورة اللي بعتبرها مقدسة فالثورة دي كشفت ان مقولة " عصر المعجزات
انتهي" كانت خاطئة لان الثورة المصرية في حد ذاتها تعتبر معجزة الهية كل شئ فيها حدث بتدخل الهي مباشر
يعني الثوار والناس العظيمة اللي كانت في التحرير وفي كل ميدان تحرير موجود في محافظات مصر بالرغم من
اللي عملوه لكن العناية الالهية هي السبب الوحيد في انتصار الثورة .
(ويمكرون ويمكر الله والله خير الماكرين) صدق الله العظيم , كل ثورة مضادة من امن الدولة وفلول الحزب الوثني
وكل محاولة للالتفاف علي الثورة او القضاء عليها سبحان الله بتفشل فشل زريع , وسرعان مابيتعرف المخطط بسرعة.
ولو جينا نتكلم علي مكتسبات الثورة هنلاقي ان المواطن المصري العادي المحبط اللي كل حياته تتلخص انه اتولد
بعد مجهوش شاق ليلة الخميس ..كبرواتعلم او متعلمش مش هتفرق وربنا كرمه بشغل كون نفسه بقي وجاب عشة
واتجوز واحدة مطحونة زيه خلف منها عيل بعد مجهود شاق جدا برضو يوم الخميس ..ليقوم ا بنه باستكمال الدايرة
المغلقة ....المواطن ده اللي عارف الصح والحق وخايف يقول بقي دلوقتي عارف الصح والحق وبيقول ويطالب ويعتصم
بقي عارف مين الصح ومين الغلط ومين معانا ومين علينا ومين منافق ومين مخلص ومين شغال مع امن الدولة ومين
شغال عشان مصر ومين مربي دقنه وعامل فيها شيخ وهو نصاب وابن 60 تيت ....ومين الشيخ اللي علي حق .
وبالمناسبة ده ليه موضوع لوحده هتكلم فيه عشان مفقوع قوي.
ميزة تانية للثورة ...ان احنا عرفنا مين هما المصريين وطبيعتهم ايه ونفسيتهم وعقليتهم عاملة ازاي.
واهم حاجة عرفنا ان اللي بني مصر كان في الاصل حلواني مش حسني مبارك...وبعد 30 سنة عرفنا ان ابو الهول
والاهرامات موجودة في مصر قبل حسني مبارك بعد ماكنا خلاص اقتنعنا ان مبارك موجود من قبل الفراعنة.
عرفنا ان الشعب المصري بركان خامل لو انفجر هيولع الدنيا كلها بس الثورة دي بركان انفجر ونضف مصر كلها.
المواطن المصري الكحيان الغلبان اللي كاره نفسه وعايش ومش عايش علي راي ابو دياب دلوقتي فاهم كل حاجة وبيحلل
ومحدش بيضحك عليه وبينزل يشارك في انتخابات ويتصور مع صباعه.
ميزة مهمة جدا جدا ,نفتكر من شهرين تلاتة كدة كان الجيش بالنسبة لينا عبارة عن عالم مجهول, قوة كونية خارقة غير
محجمة غير قابلة للنقض لو اتكلمت ولا جيبت سيرتهم في سرك هتلاقيهم ناطينلك في بنطلونك في فرشتك ويخزوقوك
زي سليمان الحلبيوتمن الخزوق كمان عليك.
انت دلوقتي ببتكلم وتنتقد وتشتم اكبر راس في الجيش وعارف ان فيه فساد وعاوز تطهره.
الثورة دي مع الفراق في التشبية طبعا عشان محدش من الاخوة يكفرني ويقيم عليا الحد اديني بقول تاني مع (الفارق في
التشبية ) عاملة زي المسلمين لما دخلوا مكة هدموا الاصنام والاوثان ...ثورة 25 يناير هدمت اوثان مصر اللي قعدت علي
قلبها عشرات السنين بس يمكن الصنم زمان لا يسمع لايري لا يتكلم ,لكن في مصر الاصنام كانت بتسمع وتري وتتكلم
وتقتل وتغتصب وتسرق واي حاجة تانية ممكن نتخيلها... والشعب المصري هو اللي كان لاحول له ولا قوة لايسمع
لا يري لا يتكلم.
لو قعدنا نتكلم عن الثورة مش هنكفيها حقها  ولا هنرد للشهداء الدين اللي ليهم في رقبتنا.
دول كلمتين كونت مزنوق فيهم كدة وعاوز اقولهم قبل منزل بكرة التحرير  في جمعة "المحاكمة والتطهير" .